شوفى ازاى ممكن تستفيدى من كرتون الحليب
الميزة فى كرتون الحليب انه مش بيتأثر بالماية عشان كده ممكن نعملها إعادة تدوير و نستغلها فى حاجات كتير
فى موضوعى النهارده انا عملت منها محفظة نسائية ودى صورتها
و ان شاء الله هعرض خطوات العمل خطوة بخطوة عشان تعرفي انت كمان تصنعيها بنفسك
تابعوا معايا الخطوات وان شاء الله تعملوه بكل سهولة
اول حاجة دى علبة الحليب
هنقص الجزء اللى فوق والجزء اللى فى القاعدة
هنفتح العلبة من الجنب بالمقص
هنتنى العلبة 3 طبقات على بعض يعنى بدل مهى 4 جوانب هنخليها 3 جوانب زى الصورة اللى جاية
ونمشى عليها بالمكواة عشان تثبت كويس
هنرسم بالقلم قوس على طرف العلبة كده
بعد كده نقصه بالمقص عشان ده هيبقى الغطاء اللى بيقفل على المحفظة
هنجيب القماشة اللى هنغفل بيها المحفظة و نحطها تحت الكرتونة وهى مفرودة زى الصورة كده ونرسم علي القماشة نفس الرسمة بس اكبر شوية ونبدأ نلزقها باى لزق عندك انا هنا استخدمت الغراء المنزلى اللى عملته قبل كده هتلاقوا طريقته فى مواضيع المدونة
هنبطنها من جوة كمان بقماشة ممكن تكون نفس لون القماشةاللى برة او تكون بلون مختلف متماشى مع اللون اللى برة انا هنا استخدمت لون تانى واستخدمت مسدس الشمع فى لزقها عشان يبقى اقوى
هنقص قماشتين بالشكل ده للجوانب
هنلزقهم فى الجوانب ركزوا فى الصورة كويس
وفى النهاية ركبت زرار و جبت شريط تنيته وخيطه فى الخلف عشان اقفل المحفظة بيه ودى النتيجة النهائيه.
اتمنى تعجبكم ان شاء الله واتمنى يكون الشرح واضح
