اعملى أحلى عيش فينو

النهارده ان شاء الله هنعمل عيش فينو ولا أجمل من كده

بصراحه وانا بعمله مكنتش متخيله انه هيطلع بالجمال ده وان شاء الله تجربوه 

ومش هتبطلوا تعملوه بعد كده ، الجميل فالعجينة دى انك ممكن تعملى بيها 

بيتزا أو كرواسون وتحشيه بأى حشوة تعجبك ، نشوف صورة العيش

الأول عشان اشجعكوا

 

نبدأ مع بعض بقى ونقول المقادير

هنقسم المقادير على جزئين الجزء الأول

• 2 كوب دقيق
• كوب ونصف ماء دافئ
• معلقة كبيرة خميرة فورية
• 2 معلقة كبيرة سكر

هنضيف السكر والخميرة للماية الدافية ونقلب كويس اوى 
وبعدين نضيف الماية للدقيق ونقلب كويس جدا ولازم منسيبش اى تجمعات من الدقيق ودى صورة المقادير بعد التقليب         

هنسيبها تخمر شوية على جنب وفى الأثناء دى هنحضر الجزء التانى من العجينة
نشوف مقاديره

• 3 كوب دقيق
• ملعقة بيكينج بودر
• نص ملعقة ملح
• نص كوب زيت

بعد محضرنا مقادير الجزء التانى نجيب بقى الجزء الأول اللى عملناه ونضيف الجزء التانى عليه ،شوفوا الجزء الأول خمرت وعلت اوى ازاى ، بصوا على الصورة اللى قبلها وانتوا تلاحظوا الفرق

 هنبدأ بقى نعجن كويس جدا لحد متتكون معانا عجينة طرية و متماسكة و مبتلزقش

لو العجينة ناشفه اوى ضيفيلها شوية ماية ، ولو العجينة لسه بتلزق ضيفيلها شوية دقيق لحد مالعجينة تتظبط فى ايدك وتبقى بالشكل ده

 هتحطيها بقى فى مكان دافئ حوالى نص ساعه كده وهتلاقيها خمرت أوى ما شاء الله وبقت كده

 هتشكليها بقى زى متحبى انا عملت منها العيش وبيتزا وزى مقولنا ممكن كرواسون كمان .

بالنسبة للعيش هتاخدى قطعة عجين قد الخوخة كده وتفرديها دائرة سمكها يكون رفيع  ( ممكن تحشيه او تسيبيه سادة ) وبعدين تلفيها على شكل اسطوانه وتجيبى السكينة وتشرطى الرغيف شرط بسيطة كده لو انت حابه انه يبقى شكله زى اللى انا عملاه ، او ممكن تسيبيه ساده زى مهو ( معلش انا مصورتش الخطوة دى لان ايدى كانت مش نضيفه وكنت هبهدل الموبايل بالعجينة ) وهاتى بيضه وعليها شوية لبن واخلطيهم كويس وادهنى وش العيش بالخليط ده باستخدام فرشة

فى وقت تحضير العجين تكونى  مولعه الفرن عشان يسخن كويس

وبعد متجهزى كل حاجه وطى بقى الفرن من تحت خليه واطى اوى على قد متقدرى وخلى الشعلات الجانبيه وسط  لا عاليه اوى ولا واطيه اوى

ودخلى بقى الصوانى بتاعتك او الصاج اللى حاطه فيه العيش وخليكى متابعاه فالفرن هيقعد حوالى 15 دقيقه ودى النتيجة

  

  كمان صورة من قريب بقى يامى يام .

 يا رب يكون الموضوع عجبكم .

    

من كرتونة ملابس لحامل دفاتر

انتوا عارفين انى بحب استغل كل حاجه عندى فالبيت وبحب اشيل اى حاجه ممكن استفيد بيها فى اى وقت ، ده حتى انا عملت مكتب مخصوص للحاجات اللى بشيلها عشان كانت عاملالى كركبة جامده والحمد لله المكتب لامم كل حاجة وحطيته جنب ماكينة الخياطة عشان يبقى كل حاجه جنب بعضها ومغلبش واقعد ادور فى كل حته عشان الاقى الحاجه اللى انا عاوزاها، ابطل كلام بقى وادخل فالموضوع بتاعنا النهارده ، كان عندى كراتين من بتاعة الملابس كنت شيلاهم برضه عشان استغلهم فى اى حاجه فعملت بيهم حامل لكراسات المدرسة بتاعة كريم ابنى ، نشوف بقى الطريقة 
دى صورة الكرتونة قبل ماعمل فيها اى حاجه

هتجيبى المسطرة وتيجى من الجنب الطويل وتقيسى طوله من عند القاعدة وتاخدى نقطة فالنص وعلى نفس الجنب بس من فوق هتقيسيه بالمسطرة برضه وتحطى نقطة وتسيبى 4 سم من على يمين النقطة ومن على شمالها وتحطى نقطة يمين وشمال وتوصلى النقطة اليمين بالنقطة اللى رسمناها فالقاعدة وتوصلى النقطة الشمال بالنقطة بتاعة القاعده هتلاقى عندك مثلث هتقصيه ونفس الطريقة دى كرريها على الجنب التانى الطويل مش القصير والصورة اللى جايه هتوضح الشرح

هتيجى بقى من نص الكرتونة وتحاولى تتنيها بالتساوى زى الصورة اللى جاية دى

وهتلزقيهم فى بعض بالغراء اللى احنا عملناه قبل كده هتلاقى الطريقة بتاعته هنا
  http://ilsac.blogspot.com/2013/03/mod.bodge.html
بعد كده تلزقى برضه بالسيليوتيب عشان تثبت بسرعه

هتيجى بقى من الجوانب المكشوفة دى وتجيبى قطعتين كرتون على مقاسهم عشان تغطيهم ، هنا كانت الكرتونة بتاعتى فيها جوانب زيادة متنيه لجوة ، انا فتحتهم ولزقتهم كده

هتلزقى الكرتون من الناحيتين ولو الكرتونة بتاعتك الوانها حلوة ممكن تسيبيها كده
بدون اى اضافات

ولو الوانها مش حلوة وعليها كتابه ممكن تجلديها من جوة وبرة بجلاد ملون حسب ذوقك، انا هنا عملتها بلونين عشان تشوفوها

وهنا بجلاد نوع مختلف ولون مختلف

اتمنى تجربوها وتقولولى رأيكوا  

اصنعى الغراء بنفسك

النهارده ان شاء الله هنتكلم عن طريقة عمل غراء فالبيت هو قريب من الغراء الابيض اللى هو غراء الخشب الابيض اللى بيستخدم فى الاعمال اليدوية
لان أحيانا الواحد بيبقى عاوز يعمل عمل فنى ويبقى من ضمن الادوات غراء ابيض
وممكن يبقى مش  متوفر وقتها مثلا او فاضل شوية صغيرين عندك ومش هيكفوا الشغل وقتها بقى ممكن تعملى الغراء المنزلى وهو طريقة سهلة جدا وحتى المكونات متوفرة عندك فالمطبخ يعنى مش هتصرفى فلوس عشان تعمليه يبقى احنا وفرنا فلوس كمان بالاضافه انه آمن وممكن تسيبى اولادك يستخدموه ويعملوا اشغال يدوية وانت مطمنة عليهم
نيجى بقى للمقادير

1. 1 كوب دقيق
2. 1\4 كوب سكر
3. 2\3 كوب ماء
4. معلقة كبيرة خل ابيض
5. معلقة زيت    

  ضيفنا الخل علشان يحمى الغراء من انه يعفن لان احنا عندنا مواد غذائيه مع الماية وده وسط مناسب جدا لنمو الفطريات لكن الخل هيمنع كده ان شاء الله
وطبعا لازم نحط الوصفه فالتلاجة بعد منجهزها
نشوف الطريقة بقى
هنجيب كسارولة ونحط فيها الدقيق والسكر ونضيف الماية ونقلب كويس جدا واهم حاجه ميكونش فيه اى كلاكيع بعد كده نضيف الخل والزيت

 نقلب كويس اوى وبعد كده نحطها على النار ، اهم حاجه بقى النار متكونش عاليه خليها وسط كده وقلبى كتير مش تبطلى تقليب وخلى بالك اوعى تغلى منك يادوب تفضل سخنة بس متغليش، وتفضلى تقلبى حوالى 10 دقايق هتلاقيها بدأت تمسك معاكى وتلزق 

بعد ال 10 دقايق شيليها من على النار وتسيبيها تبرد خالص
وهاتى برطمان نضيف له غطاء بيقفل باحكام 

وفضى الغراء فالبرطمان واقفليه كويس اوى وزى مقولنا لازم تشيليه فالتلاجة عشان الغراء ميبوظش منك

 وممكن تستخدميه فلزق الورق او الكراتين ، و تعملى بيه ديكوباج يعنى استخدميه زى مبتستخدمى الغراء الابيض بس هو بياخد وقت اكتر من الغراء الابيض عشان ينشف، اتمنى يكون الشرح واضح واتمنى تجربوه وتقولولى رأيكوا.

بنطلون من بواقى الأقمشة

بنطلون من بواقى الأقمشة

استغلى كل حاجه عندك حتى لو كانت قطعة قماش صغيرة ممكن تضفيها لقماشه تانية وتعملى حاجه باكتر  من لون
فى موضوعى ده انا استغليت قطعة قماش كانت باقيه عندى من لبس قديم مش بلبسه مع قماشة تانيه لونهم متماشى مع بعض
وعملت بيهم بنطلون لبنوتى سلمى
نشوف الخطوات بالصور
اولا هاتى القماشة ، هنا القماشة فالصورة متنيه 2

 

بعد كده اتنيه كمان مرة يعنى هتبقى متنيه 4مرات

حطى عليها بنطلون يكون مقاسه مناسب  ، وقصى شكل الباترون وخدى بالك تسيبى 2 سم من كل جنب عشان الخياطة 

بعد كده جيبت قماشة لونها أصفر بحيث يكون اللون متماشى مع القماشة دى وقصيت منها شيطين للوسط وشريطين للرجل من تحت وخيتطهم بالشكل ده بس انا ركبت اللى فالرجل وتنيتها مسيبتهاش كده

 تابعى باقى خطوات تفصيل بنطلون بكل سهولة على هذا الرابط

http://ilsac.blogspot.com/2013/02/blog-post_771.html

وادى النتيجة النهائيه للبنطلون وسلمى لابساه 

و دى  صورة كمان

 اتمنى الموضوع يعجبكم ومتترددوش لحظة انكوا تعملوا حاجه بايديكوا حتى لو مطلعتش مظبوطة من اول مرة ، المرة اللى بعدها هتكون افضل باذن الله.

اعملى مقلمة من الشنطة الجلد القديمة

مقلمة من الشنطة الجلد القديمة

مترميش حاجه و استغلى كل ما يمكنك استغلاله  واعملى حاجات محتاجاها بايديكى هتحسى بسعادة 

كان عندى شنطة جلد قديمة مش بلبسها فكرت اعمل بيها ايه فجاتلى فكرة انى ممكن اعملها مقلمة
الشنطة كان لها وش مطرز ومكانش ينفع استخدم فيه المقص لان لو دخلتى فيه المقص هتلاقى الخرز كله وقع فقصيت الوش ده وشيلته على جنب يمكن استغله فى وقت تانى
نيجى بقى للمقلمة اولا كده نشوف النتيجه

 ادى الشنطة

قصيت الوش المطرظ وبقت كده

جبت الطرفين على بعضهم وخيتطهم

وبعدين وسطنت قاعدة الشنطة وقصيت من النص بس انا مقصيتش القاعده انا قصيت الناحية اللى قصاد القاعده الصور هتشرح
افضل من الكلام

بعد كده جيبت قماشة وقصيت منها دايرتين كبار  وعملتهم وردتين بالطريقه  اللى فالصور
فالاول هتتنى الدايرة وتخيطى بغرزة السراجه
بعد متخلصى تشدى الخيط جامد هتطلعلك وردة وعملت وردتين صغيرين قوى وثبت وردة صغيرة فى نص كل ورده كبيرة

وجيبت سوسته الشنطة وخيطت فيها قماشة عشان ادارى الحواف
وهنا كل الحاجات جاهزة

وعملت بطانه للجلد من نفس القماشة

بعد كده خيطت الوردتين واحدة فى كل جانب من الجلد وركبت السوسته فوق وادى النتيجة

ملحوظة :- انا كنت بخيط بالاسود لان الخيط عندى خلص وكنت عاوزة اخلصها بسرعه النهاردة عشان تشوفوها يا رب تكون عجبتكم
 والمفروض انزل بكرة اشترى علبة خيط جديدة ان شاء الله.

حامل اكسسوارات من ورق المجلات

حامل اكسسوارات من ورق المجلات

طبعا كلنا عندنا مجلات كتير اوى مركونة وبنبقى عاوزين نرميها لكن بنسيبها يمكن نستفيد منها فى اى وقت 

انا بقى فكرت كتير اعمل منها ايه واستفيد منها ازاى وفجأة جاتلى فكرة  انى اعمل منها استاند للاكسسوارات والتوك

تعالوا نشوف الطريقه

الادوات

ورق مجلات 

مسدس شمع 

2 سى دى 

مشرط او (cutter )

سبراى الوان باللون اللى تفضليه 

مناديل ورق + غراء ابيض (يمكن الاستغناء عنه)

الطريقة

هنجيب ورق المجلات نلفه على عصاية الشيش طاووك بالشكل ده وبعد منخلص لف الورقه نلزقها بالصمغ

 هنعمل عدد كبير و نلزقهم مع بعض بالسليوتيب او نربطهم بالخيط زى انا معملت 

وبعدين نلزقها على السى دى

 بعد كده هنعمل رولات ورق كمان ونقطعهم صغيرين كده ونلزق كل 5 او 6 مع بعض 

 ونلزقهم على الستاند كده

 وهنا بعد مخلصنا ولزقناهم كلهم (  انا عملت 9  )

 هنغطيهم بمناديل ورق مغرقنها فى غرا ابيض مخفف، هنخرجه البلكونة ينشف بس لما جيت تانى يوم اشوفه لقيته مميل
فجيبت رول من بتاع ورق الالمونيوم وقطعت منه جزء دخلت فيه الستاند من تحت وركبتهم فى علبة بلاستيك صغيرة
ولزقتهم على السي دى بالطريقه دى بقت ثابته ومش مميله
انت ممكن من البداية تستعملى رول الورق ده بدل المجلات بس فى ناس معندهاش واحنا هنا برضه عاوزين نستغل ورق المجلات

 بعد كده هنرشها بالاسبراي ده

 وهنا بعد منشفت

 وعشان أدارى الجزء اللى تحت ده ركبت الورده دى

 وهنا الحامل وهو عليه الاكسسوارات .

 انتهى الموضوع ولكن لم ينتهى الابتكار بعد ، مادمتى تبحرين بخيالك فى محيطات الابداع .