طريقة عمل أحلى دانيت شيكولاته

أكيد معظمنا بيحب دانيت و خاصة بالشيكولاته 
و الأطفال الصغيرين بيعشقوه 
ايه رأيكم نعمل مع بعض أحلى دانيت شيكولاته فى البيت ؟
الجميل انه سهل جدا
و مكوناته كلها موجودة فى المطبخ و مش مكلف أبدا
نبدأ نقول المقادير

3 كوب لبن
3 ملعقة نشا متدوبة فى ربع كوب لبن
6 ملعقة كبيرة كاكاو
6 ملعقة كبيرة سكر
معلقة كبيرة زبدة

لو تلاحظوا المكونات هتلاقوا ان كل كوب لبن بنعبرله
( معلقة نشا +2 ملعقة كاكاو+ 2 ملعقة سكر )

الطريقة
هنجيب حلة نخلط فيها اللبن + الكاكاو + السكر + الزبدة
هنرفعهم على النار و نسيبها لحد متغلى
بعد كده نضيف النشا باللبن واحدة واحدة ونقلب 
و نسيبهم عالنار يغلوا دقيقتين ونطفى النار
و نصبهم فى الكاسات وبألف هنا .

chocolate cake كيك الشيكولاتة

بداية  كده الناس اللى بتعمل ريجيم يمتنعوا لأن الكيك ده هيبوظ أى نظام ريجيم
الكيك طعمه رائع و ان شاء الله يعجبكم والأطفال هتحبه جدا
نبدأ مع بعض  بالمقادير 

أولا صوص الشيكولاتة
1 كوب كاكاو خام
1 كوب لبن حليب
1 كوب زيت
1 كوب سكر
هنضرب كل المكونات مع بعض فى الخلاط و ناخد كوب من الصوص اللى اتكون
ونشيله فى الفريزر
و الصوص المتبقى نصبه فى اناء

ثانيا الكيك
2 و نصف كوب دقيق
2 ملعقة سمنة
كوب سكر
5 بيضات
معلقة كبيرة بيكينج بودر
رشة فانيليا

الطريقة
هنضيف الفانيليا للبيض و السكر ونضربهم كويس جدا فى الخلاط
نضيف السمنة ونستمر فى ضرب الخليط
نضيف البيكينج بودر للدقيق و نضيفهم واحدة واحدة للخليط ونضربهم كويس
خلصنا كده المقادير دى 
نضيفلهم فى الآخر صوص الشيكولاتة ونقلبهم كويس جدا

طبعا خلال تحضير الكيك بنكون مشغلين الفرن بتاعنا عشان يسخن كويس
ونجيب صينية الكيك ونبطنها بالزبدة و الدقيق ونصب فيها الخليط

هنسيبها على درجة حرارة عالية لمدة 10 دقايق فى الرف الوسط من الفرن
بعد كده نهدى عليها النار و نسيبها تقريبا 25 دقيقة او لحد متطيب
نخرجها من الفرن ونسيبها تبرد خالص

بعد متبرد هنقسم الكيك لطبقتين ونجيب الصوص اللى فى الفريزر ونحشى الكيك بجزء من الصوص ونقفل طبقتين الكيك على بعض و بعد كده نصب باقى الصوص عليها 

بعد كده نقطعها و نقدمها و بألف هنا 

كيف تصنعين شيكولاته تزيين الحلويات من دون الشيكولاته الخام .

             
لا شك أن كثيرا منا يعشق  الحلويات كالعك والبسكوت و البيتي فور وغيرها من الحلويات و ما أطعمها عندما تكون مزينة و جميلة المنظر

و أكثر الناس يحبون الحلوى المزينة بالشيكولاتة ، وجميعنا يعرف أن الشيكولاتة المستخدمة فى تزيين تلك الحلويات هى الشيكولاتة الخام بعد اذابتها ، لكن فى بعض الأحيان لا تكون تلك الشيكولاته موجودة فى مطبخك
 فكيف تتصرفين وقتها ؟
فى موضوعنا اليوم نقدم لكى سيدتى وصفة سهلة و بسيطة لصنع شيكولاتة التزيين من دون الشيكولاتة الخام .
المكونات

5 ملعقة  كبيرة كاكاو
5 ملعقة كبيرة لبن بودرة
3 ملعقة كبيرة سكر
نصف كوب لبن
ملعقة كبيرة زبدة أو 2 مكعب زبدةالطريقة 

 

ضيفى كل المكونات معا فى اناء

و ارفعيه على نار متوسطة حتى تتجانس المكونات
قوم بالتقليب لمدة 10 دقائق
ثم انزليه من على النار
دعيه يبرد قليلا
ثم قومى بتزيين الحلويات بغمسها فى الشيكولاته
أو اضافة الشيكولاته اليها بملعقة او بصبها فوق الحلويات
أو كما يحلو لك .
يمكنك اضافة ملعقة شيكولاتة نوتيلا  أو يمكنك الاستغناء عنها حسب الرغبة .

ديك رومى فى الفرن سهل و مميز The Perfect Turkey

المقادير

ديك رومى
ملح - فلفل - بهارات - هيل
قرفة - زنجبيل - بابريكا - كركم
3 بصلة
2 حبة  طماطم
2 حبة جزر
2 ملعقة صلصة كبيرة
نصف كوب زيت
كيس حرارى

الطريقة

أولا نحضر الديك الرومى نغسله جيدا و نجففه ثم نضعه فى الفريزر
لمدة يومين فتلك الخطوة مهمة جدا حيث تجعل اللحم طريا وسهل الطهي

بعد مرور يومين نخرج الديك الرومى من الفريزر ونتركه يتفكك من الثلج تماما ثم نرشه من الداخل بالملح ونتركه ساعة لتيصفى .
بعدها نقوم بتحضير الحشوة وهى عبارة عن بصل + طماطم + جزر + كل التوابل الموجودة فى قائمة المقاديرثم نضربهم معا فى الخلاط .
بعدها نقوم بفصل الجلد عن اللحم برفق ثم نضع تلك الخلطة بين الجلد و اللحم .
 

الآن نحضر الصلصة و نخلطها مع الزيت وبعض الملح و الفلفل يمكنك أيضا اضافة بعض أوراق الاعشاب العطرية مثل الروزماري أو النعناع أو ما تفضليه

ندهن الديك الرومى بالخلطة ثم نضعه فى  كيس الفرن نضعه فى الثلاجة
ليله كامله و تانى يوم ندخله الفرن .



الآن كيف نحسب الوقت اللازم لطهي الديك الرومى بالكامل ؟
كل كيلو جرام يساوى ساعه فى  الفرن ، بمعنى انه لو كان وزن الديك الرومى  3 كيلو
فسوف يستغرق 3 ساعات فى الفرن حتى يكتمل السوى .
والآن وبعد 3 ساعات الديك الرومى جاهز وبالهنا و الشفا .

اعملى أحلى عيش فينو

النهارده ان شاء الله هنعمل عيش فينو ولا أجمل من كده

بصراحه وانا بعمله مكنتش متخيله انه هيطلع بالجمال ده وان شاء الله تجربوه 

ومش هتبطلوا تعملوه بعد كده ، الجميل فالعجينة دى انك ممكن تعملى بيها 

بيتزا أو كرواسون وتحشيه بأى حشوة تعجبك ، نشوف صورة العيش

الأول عشان اشجعكوا

 

نبدأ مع بعض بقى ونقول المقادير

هنقسم المقادير على جزئين الجزء الأول

• 2 كوب دقيق
• كوب ونصف ماء دافئ
• معلقة كبيرة خميرة فورية
• 2 معلقة كبيرة سكر

هنضيف السكر والخميرة للماية الدافية ونقلب كويس اوى 
وبعدين نضيف الماية للدقيق ونقلب كويس جدا ولازم منسيبش اى تجمعات من الدقيق ودى صورة المقادير بعد التقليب         

هنسيبها تخمر شوية على جنب وفى الأثناء دى هنحضر الجزء التانى من العجينة
نشوف مقاديره

• 3 كوب دقيق
• ملعقة بيكينج بودر
• نص ملعقة ملح
• نص كوب زيت

بعد محضرنا مقادير الجزء التانى نجيب بقى الجزء الأول اللى عملناه ونضيف الجزء التانى عليه ،شوفوا الجزء الأول خمرت وعلت اوى ازاى ، بصوا على الصورة اللى قبلها وانتوا تلاحظوا الفرق

 هنبدأ بقى نعجن كويس جدا لحد متتكون معانا عجينة طرية و متماسكة و مبتلزقش

لو العجينة ناشفه اوى ضيفيلها شوية ماية ، ولو العجينة لسه بتلزق ضيفيلها شوية دقيق لحد مالعجينة تتظبط فى ايدك وتبقى بالشكل ده

 هتحطيها بقى فى مكان دافئ حوالى نص ساعه كده وهتلاقيها خمرت أوى ما شاء الله وبقت كده

 هتشكليها بقى زى متحبى انا عملت منها العيش وبيتزا وزى مقولنا ممكن كرواسون كمان .

بالنسبة للعيش هتاخدى قطعة عجين قد الخوخة كده وتفرديها دائرة سمكها يكون رفيع  ( ممكن تحشيه او تسيبيه سادة ) وبعدين تلفيها على شكل اسطوانه وتجيبى السكينة وتشرطى الرغيف شرط بسيطة كده لو انت حابه انه يبقى شكله زى اللى انا عملاه ، او ممكن تسيبيه ساده زى مهو ( معلش انا مصورتش الخطوة دى لان ايدى كانت مش نضيفه وكنت هبهدل الموبايل بالعجينة ) وهاتى بيضه وعليها شوية لبن واخلطيهم كويس وادهنى وش العيش بالخليط ده باستخدام فرشة

فى وقت تحضير العجين تكونى  مولعه الفرن عشان يسخن كويس

وبعد متجهزى كل حاجه وطى بقى الفرن من تحت خليه واطى اوى على قد متقدرى وخلى الشعلات الجانبيه وسط  لا عاليه اوى ولا واطيه اوى

ودخلى بقى الصوانى بتاعتك او الصاج اللى حاطه فيه العيش وخليكى متابعاه فالفرن هيقعد حوالى 15 دقيقه ودى النتيجة

  

  كمان صورة من قريب بقى يامى يام .

 يا رب يكون الموضوع عجبكم .

    

قراقيش بالعجوة

قراقيش بالعجوة

المقادير:-

  - 3 كوب دقيق 

- 1\2 كوب سكر بودرة 

- ملعقة بيكينج بودر 

- 1\4 كوب زيت 

- 1\4 كوب سمنة

 - كوب لبن دافى 

- بيضة وفانيليا

 - نص كيلو عجوة مهروسة بالزيت والقرفه

الطريقة :-

نضيف (سكر + دقيق +بيكينج بودر + فانيليا ) ونقلبهم معا جيدا

ثم نضيف  ( الزيت والسمن ) ونقلب 

ثم نضيف ( اللبن )حتى تتكون عجينة متماسكة

بعد ذلك نفرد العجينة على شكل شرايط ونحشيها عجوة ونغطيها بشرايط عجين أخرى ونقطعها حسب الشكل المراد

مثلثات او مربعات او اى شكل آخر 

وندهن الوجه بالبيض وندخلها فرن متوسط الحرارة حتى يحمر الوجه تقريبا تستغرق  20 دقيقة

بس ابقوا تابعوها فالفرن . وبالهنا والشف