فراشة بالكروشيه ( تطبيق على غرزة العمود بلفتين و العمود بلفة )

أتمنى تكون الناس متابعة معانا الدورة وبيشوفوا الدروس بانتظام
آخر درسين أخدناهم كانوا غرزة العمود بلفة و العمود بلفتين
و العمل اللى هنعمله فى موضوعنا ده هيكون تطبيق على الغرزتين دول

هنعمل مع بعض فراشة بطريقة بسيطة وسهلة جدا و ان شاء الله تعملوها بسهولة
دى صورة للعمل بتاعنا

الطريقة كالآتى
أول حاجه هنعمل 4 سلسلة ونقفلهم مع بعض ب منزلقة
ونعمل 4 غرزة سلسلة

الشغل كله هيكون من خلال الفتحة اللى فى المنتصف
بعد كده نعمل 3 غرز عمود بلفتين
و3 غرزة سلسلة ونقفلها بمنزلقة 

هنكرر اللى عملناه مرة كمان
4 سلسلة
3 عمود بلفتين
3 سلسلة - منزلقة

نعمل 3 غرزة سلسلة

نعمل 3 غرزة عمود بلفة
نعمل 3 غرزة سلسلة

نقفلها بغرزة منزلقة خلال الفتحة اللى فى المنتصف

نكرر اللى عملناه مرة كمان

3سلسلة

3 عمود بلفة

3 سلسلة - منزلقة

هنجيب خيط بلون تانى ونلفه مرتين من بين الجناحين من فوق و من تحت ونربطه فوق بحيث يفضل فتلتين طالعين لفوق

و كده خلصنا الفراشه 

دورة تعليم الكروشيه للمبتدئات ( درس 6 غرزة العمود بلفتين )

زى مقولنا قبل كده فى الدرس اللى فات ان غرزة العمود بلفة هى غرزة مشتقة من غرزة النصف عمود.
عندنا كمان النهاردة 
غرزة العمود بلفتين
و هى برضه مشتقة من غرزة النصف عمود
الاسم بالانجليزية : Treble crochet
الاختصار فى الباترون المكتوب : tr
الرمز : 

قولنا ان غرزة العمود بلفة ارتفاعها 3 سلسلة و كنا قبل منبدأ الشغل بنسيب ال 3 سلسلة وندخل فى السلسلة الرابعة
وغرزة العمود بلفتين طولها 4 سلسلة يعنى عشان نعمل أول  غرزة عمود بلفتين لازم هنسيب 4 سلسلة و ندخل فى السلسلة الخامسة
طيب نشوف الطريقة مع بعض 

- أول حاجة هنلف الخيط على الابرة مرتين يبقى كده الابرة عليها 3 حلقات خيط

- هندخل فى خامس سلسلة بعد الابرة ونلف الخيط على الابرة  ونطلع بيه من نفس السلسلة اللى دخلناها يبقى كده الابرة عليها 4 حلقات نلف الخيط مرة كمان على الابرة يبقوا كده 5 حلقات على الابرة و نطلع من حلقتين يبقى كده فاضل 3 حلقات

هنلف الخيط مرة كمان يبقوا 4 حلقات ونطلع من حلقتين هيفضل حلقتين

نلف الخيط مرة كمان على الابرة  يبقوا 3 حلقات

 هنطلع من حلقتين هيفضل حلقة واحده

ولو عاوزين نكمل الغرزة لىخ السطر هندخل فى الغرزة اللى بعدها علطول ونكمل كده لآخر السطر
طيب لو عاوزين نبدأ صف جديد يبقى نعمل 4 غرزة سلسلة و ندخل فى آ خر غرزة عمود بلفتين تحت و نكمل 
ودى صورة كمان

و دى صورة متحركة بتوضح طريقة عمل الغرزة

يا رب يكون الدرس النهارده سهل و مفهوم

الواجب
عمل 14 سلسلة
و نكمل فوقها 3 صفوف من غرزة العمود بلفتين

قلب بالكروشيه ( تطبيق على غرزة العمود و النصف عمود )

هنتعلم مع بعض فى درسنا النهارده طريقة عمل قلب كروشيه
بالغرز اللى اتعلمناها قبل كده وخاصة غرزة العمود وغرزة النصف عمود
نشوف صورة القلب 

أحب أنوه انى وانا بكتبلكوا الخطوات بالعربى هكتبلكم الخطوات بالانجليزى عشان تتعودواعلى شكل الباترونات المكتوبة بالانجليزى وان شاء الله هتلاقوها سهله جدا لان معظمها رموز الغرز و احنا الحمد لله عارفين رموز الغرز اللى اخدناها

أولا هنعمل الدائرة السحرية اللى اتعلمناها قبل كده ودى صورة عشان اللى مش عارف الطريقة
هنعمل الخطوات لحد الخطوة رقم 3 وهنعمل 3 سلسلة 3 ch

عملنا ال 3 سلسلة 3 ch

نعمل 4 غرزة عمود 4 dc هنعملهم من خلال الفتحة اللى فى نص الدائرة

بعد كده نعمل 3 غرزة نصف عمود

و غرزة واحدة حشو

3hdc و 1sc

 

هنكمل بعكس اللى عملناه يعنى نعمل 3 غرزة نصف عمود

 بعدها 4 غرزة عمود

بعدها 3 سلسلة 

ونشبكهم بغرزة منزلقة من خلال فتحة الدائرة

 (  3hdc , 4dc , 1sl)

هنشد الفتلة القصيرة من الخيط عشان نقفل الدائرة اللى فى النص
ونبدأ بغرزة حشو فى الفتحة اللى عملت عليها سهم أحمر

 ( 1sc in space ) 

فى الغرزة اللى بعد كده هنعمل 2 غرزة نصف عمود (2hdc in next st)

بعد كده 3 غرزة نصف عمود فى الغرزة اللى بعدها (3hdc in next st )

فى الغرزة التالية نعمل 2 غرزة نصف عمود (2hdc in next st)

غرزة واحدة نصف عمود فى كل غرزة من ال3 غرز القادمين (1hd in next 3 st)

 

وفى الغرزة القادمة 2 غرزة نصف عمود (2hd in next st)

فى الغرزة القادمة نعمل غرزة نصف عمود غرزة عمود غرزة نصف عمود (1hdc,1dc,1hdc)

هنرجع بعكس الغرز اللى شغالين بيها
2hdc in next st   
1hdc in next 3 st
2hdc in next st
3hdc in next st
2hdc in next st
هندخل  بغرزة حشو وغرزة منزلقة  (in space 1sc ، 1sl ) فى الفتحة المقابلة للفتحة اللى عليها سهم أحمر فوق
يعنى تحت ال 3 سلسلة اللى ختمنا بيهم الصف الأول
و ده الشكل النهائى للقلب

 ممكن نمشى على القلب بغرزة منزلقة بلون تانى  زى الصورة دى أو نسيبه زى مهو
وان شاء الله هنخصص درس لطريقة تغيير اللون واحنا بنشتغل .

دورة تعليم الكروشيه للميتدئات (درس 5 غرزة العمود بلفة )

الدرس اللى فات اتعلمنا ازاى نعمل غرزة النصف عمود
والنهارده ان شاء الله هنتعلم غرزة مشتقه من غرزة النصف عمود وهى غرزة العمود بلفة ولو انتوا اتدربتوا كويس على غرزة النصف عمود هتلاقوا درس النهاردة سهل جدا بالنسبة لكم و كمان الدروس اللى جاية لانها برضه غرز مشتقة من النصف عمود

غرزة العمود بلفة
الاسم بالانجليزية double crochet
الاختصار dc
الرمز فى الباترون 

طريقة عمل الغرزة

- هنعمل صف من 14 غرزة سلسلة

- نلف الخيط على الابرة مرة واحدة
قبل كده قولنا ان ارتفاع غرزة الحشو سلسلة واحدة
وغرزة النصف عمود سلسلتين
وهنقول النهاردة ان ارتفاع غرزة العمود 3 سلسلة ، فلما نيجى نبدأ بيها فى أول السطر

- هندخل فى السلسلة رقم 4 من بعد الابرة

- نلف الخيط على الابرة مرة واحدة و نطلع من نفس الغرزة اللى دخلنا فيها

- طلعنا من الغرزة اللى دخلنا فيها  ، هنلف الخيط مرة على الابرة يبقى فيه  4 لفات خيط على الابرة
لحد هنا احنا ماشيين بنفس طريقة غرة النصف عمود
الاختلاف بقي
ان احنا هنا فى غرزة العمود هنسحب اخر حلقة لفيناها على الابرة و نخرج بيها من لفتين اتنين فهيفضل لفتين خيط على الابرة

باقى لفتين خيط على الابرة 

هنلف الخيط مرة واحده كمان على الابرة و نخرج بيها من اللفتين الموجودين على الابرة  بحيث يفضل لفه خيط واحده بس على الابرة .

زى مقولنا هيفضل لفه خيط واحدة بس على الابرة

نكمل فى الغرزة اللى بعدها علطول لحد آخر الصف

طيب لو عاوزين نعمل صف تانى يبقي نعمل 3 غرزة سلسلة و نقلب الشغل الناحية التانيه ونشتغل الغرزة زى ماتعلمنا 

و دى صورة متحركة توضح طريقة عمل الغرزة 

دول صور ل 3 قطع صوف مشغولين بال 3 غرز
الحشو single stitch
النصف عمود  Half double crochet
العمود double crochet

وردة من الكروشيه (تطبيق على غرزة النصف عمود )

بعد ماشرحنا ازاى نعمل غرزة النصف عمود
هنطبق اللى احنا اتعلمناه على الوردة دى 

و طبعا الوردة دى مش كلها غرزة النصف عمود
داخل فيها غرزة السلسلة والمنزلقة و الحشو يبقى لما احنا نعملها يبقى كمان
طبقنا اللى اتعلمناه فى الدروس الأربعه اللى أخدناهم
هنبدأ مع بعض طريقة عمل الوردة



- نعمل صف من غرزة السلسلة بعدد 51 غرزة

- نبدأ السطر بغرزة حشو يعنى هنسيب أول غرة و ندخل فى تانى غرزة سلسلة
- نعمل 2 غرزة سلسلة 

- نفوت غروة سلسلة من اللى تحت وندخل فى الغرزة اللى بعدها ونعمل غرزة حشو

- نفوت غرزة سلسلة من اللى تحت وندخل فى اللى بعدها و نعمل غرزة حشو
-نعمل 2 غرزة سلسلة

-نفوت غرزة سلسلة من اللى تحت و ندخل فى الغرزة اللى بعدها بغرزة حشو

لو تلاحظوا احنا بنكرر الجزء الأول ، هنفضل ماشيين بالطريقة دى لحد منخلص
و ده شكل العمل بعد مخلصنا الصف بتاعنا ، زى مانتوا شايفين بدأنا بغرزة حشو Sc 
عملنا 2 سلسلة  Ch فوتنا غرزة تحت ختمنا بغرزة حشو Sc ونفوت غرزة ونكرر

هنبدأالصف التانى وفى ملاحظة مهمة هنا ، و هى ان كل الغرز اللى هنعملها بعد كده هتبقى من خلال الفتحة اللى عليها سهم فى الصورة دى ولو تلاحظوا هتلاقوا الفتحة دى موجودة تحت كل 2 غرزة سلسلة عملناهم تحت .

زى مقولنا قبل كده ملا نبدأ صف جديد بنقلب الشغل و نبدأ

فى الفتحة الأولى

-هنبدأ ب 2 غرزة سلسلة
- نعمل 3 غرزة نصف عمود

-نختم بغرزة منزلقة
هنروح على الفتحة التانية
- نبدأ بغرزة منزلقة
- بعدها غرزة سلسلة

- و3 غرزة نصف عمود

-نختم بغرزة منزلقة

نروح على الفتحة الثالثة

-نبدأ بغرزة منزلقة

-بعدها غرزة سلسلة

-بعدها 3 غرز نصف عمود

-نختم بمنزلقة

هنروح على الفتحة الرابعة

نكرر اللى بنعمله فى كل فتحة

لكن هنعمل 4 غرزة نصف عمود مش 3

والفتحة الخامسة 

نكرر اللى بنعمله 

لكن هنعمل  5 غرزة نصف عمود

و بعد كده نبدل ما بين 4 نصف عمود و 5 نصف عمود

لحد منخلص الشغل بتاعنا و الصورة دى بتوضح عدد غرز النصف عمود فى كل فتحة

و ده شكل العمل بعد ما خلصناه

احنا كده خلصنا فاضل بس نلف العمل على بعضه
هنلف من جهة ال 3 غرز نصف عمود وممكن تخيطوها من تحت بعد ماتخلصوا
أو تلزقوها بشمع و انا بفضل الشمع لأنه بيمسك جدا فى الخيط الصوف
وصعب يفك منه .

بتمنى العمل يكون عجبكم
وبتمنى الشرح يكون وافى و سهل .

دروة تعليم الكروشيه للمبتدئات ( درس 4 غرزة النصف عمود )

بفضل الله اتعلمنا فى الدروس السابقة 3 أنواع من غرز الكروشيه
السلسلة
المنزلقة
الحشو

 
و فى الدرس ده هنتعلم ان شاء الله الغرزة الرابعة اللى هى غرزة النصف عمود أو غرزة البريد المنزلقة
الاسم الانجليزى : half double crochet
الاختصار : hdc
رمز الغرزة : 

قبل كده قولنا ان غرزة الحشو ارتفاعها سلسلة واحدة عشان كده  كنا بنعمل سلسله واحده قبل منعمل غرزة الحشو

و غرزة النهاردة النصف عمود ارتفاعها 2 سلسلة بمعنى اننا لما نيجى نشتغلها هنرتفع بعدد 2 سلسلة قبل منعمل الغرزة

الطريقة 
أولا لما نيجى نشتغلها فوق أول صف من السلسلة هنسيب عدد 2 سلسلة  ( ارتفاع غرزة النصف عمود ) وبعدين نعمل الغرزة
بنلف الخيط على الابرة مرة واحدة يبقى كده موجود على الابرة حلقتين
ندخل فى تالت غرزة سلسلة بعد الابرة
نسحب الخيط ونطلع من نفس الغرزة يبقى عندنا 3 حلقات خيط على الابرة
نلف الخيط مرة كمان على الابرة يبقى كده 4 حلقات خيط على الابرة
نسحب آخر حلقة من ال3 حلقات بحيث يفضل حلقة خيط واحدة على الابرة
لو عاوزين نكمل غرزة كمان يبقى نلف الخيط على الابرة ندخل فى الغرزة التاليه نلف الخيط على الابرة نسحبه و نلف الخيط على الابرة مرة كمان و نسحب من ال3 حلقات ونكمل لآخر الصف .

طيب لو خلصنا الصف بتاعنا وعاوزين نبدأ صف جديد يبقى نقلب الشغل بتاعنا ونعمل عدد 2سلسلة وندخل فى تانى غرزة تحت ونكمل الغرزة زى مشرحنا

صورة متحركة لتوضيح الغرزة

الواجب
عمل 12 غرزة سلسله و عمل 5 صفوف من غرزة النصف عمود فوقهم .