دورة تعليم الكروشيه للمبتدئات ( درس 3 )

النهارده ان شاء الله هنتعلم ثالث غرزة فى فن الكروشيه وهى
غرزة الحشو
اسمها فى اللغة الانجليزية Single crochet
الاختصار : sc
رمزها فى الباترون 

 او

 

غرزة الحشو طولها = 1 سلسلة ، و ده معناه أنّنا لو هنبدأ في صف جديد بغرزة حشو يتم أوّلا عمل غرزة سلسلة (تمثل ارتفاع غرزة الحشو ) ثم نستكمل الصّف حسب الباترون.

وطريقة عملها تقريبا زى طريقة النائمة او المنزلقة ولكن مع اختلاف بسيط
زى مهنشوف فى الشرح دلوقت بالصور

طريقة عملها 

 هنعمل مثلا سطر من  10غرز سلسلة هنسيب أول غرزة وندخل فى تانى غرزة سلسله بالابرة ونلف الخيط على الابرة ونسحب الابرة من الغرزة اللى دخلنا منها، دلوقت الابرة عليها لفتين خيط بعد كده هنلف الخيط مرة كمان على الابره ونسحب اللفة التالتة من حلقتين الخيط من على الابرة بحيث يفضل عندنا لفه واحده بس على الابرة ، وعشان نعمل غرزة الحشو التانيه هندخل بالابرة فى غرزة السلسله التاليه علطول يعنى مش هنسيب غرزة زى ما عملنا فى الأول ، وهنستمر نعمل غرزة الحشو لحد منخلص السطر بتاعنا .
دلوقت احنا كنا عاملين 10 غرزة سلسله و عملنا فوقهم سطر من غرزة الحشو 
لو عديناهم هنلاقيهم 9 غرزة حشو ده عشان احنا سيبنا غرزة سلسله فى الأول 

طيب لو عاوزين نعمل كمان سطر من غرزة الحشو يبقى هنعمل غرزة سلسله واحدة  زى مقولنا فوق ان ده هو طول الغرزة الجديدة و نلف الشغل الناحيه التانيه و ندخل من تحت آخر غرزة حشو عملناها اللى هى هتبقى أول غرزة لما نقلب الشغل بتاعنا .

ونستمر فى عمل غرز الحشو لحد منخلص السطر بتاعنا و نعمل غرزة سلسله واحده و نقلب الشغل و نستمر ...لازم نعد الغرز لأن ده مهم جدا عشان شغلنا يبقى مظبوط .

 

و دى صورة لقطعة من الصوف تم عملها بغرزة الحشو

و دى صورة متحركة لشرح توضيحى للغرزة .

يا ريت و احنا بنشتغل  منقعدش نشد فى الخيط
عشان الشغل بتاعنا يبقى مرتاح و مش مشدود
عشان نقدر نشتغل بسهولة .

الواجب
عمل 11 غرزة سلسله ونعمل فوقهم 5 سطور من غرزة الحشو .