دورة تعليم الكروشيه للمبتدئات ( درس 2 )

اتعلمنا الدرس اللى فات ازاى نعمل عقدة البداية وغرزة السلسلة 
اللى زى مقولنا انها أهم غرزة فى الكروشيه
النهارده ان شاء الله هنتعلم مع بعض تانى غرزة فى الكروشيه واسمها



الغرزة المنزلقة أو الغرزة النائمة 
الاسم الانجليزى : slip stitch
وstitch = غرزه وجمعها stitches
الاختصار : sl st ( اخذنا الحرفين الاوائل من كل كلمه 
الرمز : 
أو بتكون دايرة صغيرة مغلقة لونها اسود

   

وهى لا تعتبر غرزه بالمعنى المفهوم فلا يمكن شغل اى شئ بها مثل بلوزه او مفرش وانما تستخدم مثل ابره الخياطه العاديه ( اى انها اداه للشبك ) فنشبك بها قطعتين من الكروشيه بدلا من الخياطه بالابره العاديه او تستخدم لغلق دائره او الانتقال من مكان لاخر فى الباترون دون ان يؤثر على ارتفاع او شكل السطر بدلا من قطع الخيط واعاده شبكه فى الجزء المراد العمل فيهأو تزيين أطراف الشغل بتاعنا
ودى أمثلة بالصور لاستخدامات الغرزة للتزيين .




_________________________________طريقة عمل الغرزة
لو احنا هنقفل بيها دايرة 
احنا مثلا عملنا 6 غرز سلسلة وعاوزين نقفلها دايرة، فالابرة هتكون فى الفتحة اللى فوق آخر غرزة سلسلة عملناها هنروح مدخلين الابرة فى أول غرزة سلسلة عملناها ( هتبقى الابرة كده عليها حلقتين ) و نشد الخيط ونطلع بيه من الحلقتين مع بعض بحيث تبقى الابرة عليها حلقه واحده بس 

و دى صورة كمان

 ________________

طيب لو احنا هنعملها ونمشى بيها على سطر من الغرز هتبقى ازاى ؟

مثلا زى الصورة دى احنا عندنا الابرة عليها حلقة خيط هندخل الابرة فى الغرزة اللى بعد اللى احنا واقفين عليها يبقى كده الابرة عليها حلقتين بعد كده هنسحب طرف الخيط بتاعنا بالابرة من الحلقتين .
ودول أكتر من صورة توضيحية للابرة




و دى صورة متحركة لتوضيح طريقة عمل الغرزة المنزلقه .
بندخل بالابرة من تحت الغرزة التاليه نسحب الخيط ونطلع بيه من الحلقتين .

الواجب
1-عمل 6 سلسله و غلقها بغرزة منزلقه لعمل دائرة
2- عمل 10 غرز سلسلة و نتابع فوقها بصف من الغرز المنزلقة