طريقة عمل سكارف كروشيه بغرزتى السلسلة و المنزلقة

اتعلمنا  فى الدرس الأول و التانى طريقة غرزة السلسلة والغرزة المنزلقة
وبالرغم من انهم غرزتين بساط جدا لكن نقدر نعمل بيهم حاجات جميله زى
سورتيت ، اسورة ، عقد ، وردة رقيقة و كمان سكارف زى الى فى الصورة

الاسكارف بسيط جدا و هنشرح طريقته بالتفصيل


الأدوات
 خيط صوف سميك
ابرة نمرة 9
الطريقة
1- هنشتغل صف طويل مكون من 125 غرزة سلسلة ونقفله بالغرزة المنزلقة
 و نقص الخيط يبقى احنا كده عندنا دايرة مغلقه مكونه من 125 غرزة سلسلة و مغلقة بالمنزلقه.
ملحوظة مهمة
ازاى ننهى الدائرة ونقص الخيط من غير مالغرز تفك مننا ؟
الصورة دى هتوضحلنا الطريقة ببساطة شديدة
1- نقص طرف الخيط  2- نشيل الابرة
3- ندخل طرف الخيط فى الفتحة  4- نشد الخيط جامد

  

2- هنكرر الخطوة الأولى لحد منعمل 10 دوائر أو أكتر زى متحبى

3- هنجمع ال 10 دوائر فى ايدينا زى الصورة دى كده و نراعى ان الجزء اللى فيه تقفيل الدواير من كل سلسلة يكونوا جنب بعض تحت ايدينا .

   

 4- هنلف على الجزء ده خيط كتير ونربطه من تحت أو نعمل صف طويل من غرزة السلسلة ونلفه على الجزء اللى مسكينه بادينا  زى الصورة دى كده .

 ممكن نزينه فى النهاية بزرار كبير شيك
أو نعمل وردة جميلة من الكروشيه ونزينه بيها 

 

وان شاء الله هنعمل موضوع خاص لطريقة عمل وردة رقيقة 

من غرزة السلسلة والمنزلقة .

 اتمنى يكون الشرح واضح ومفيد ، دمتم فى حفظ الله .